अज मिये बोबो तिन्नें पाई पल़चाई दित्ती ,
नणाना कन्नें लौकी भ़रौजी लड़ाई दित्ती ।
देया बाभ़ो सारा टब्बर रैह़ंदा था प्यारे ने ,
बड़कें अद्धे अँगणें च तार लोआई दित्ती ।
स्यापा भ़ी जल़या तदुँआ ते लग्गा पौंणां ,
जद्धौकी बिट्टिया दी करी कुड़माई दित्ती ।
त्रिये म्ह़ीनें चुल्ह़ीं लग्ग थिंयाँ करी लियाँ ,
तेरे भ़णोए दी मिये मसें मैं छमाह़ी कित्ती ।
बड़ी बुरी गत मिये, जीणां ह़ोया मुस्कल ,
ह़ुण ता मैं भ़ी जीणें दी चाह़ मुकाई दित्ती।।
---------------- मनोज मैहता -----------------
No comments:
Post a Comment