Please leave me as I am

म्ह़ाँजों तुसाँ दिले ते कड्ढया, ह़ुण सुपनें भ़ी ओंणां छड्डा
अपण ह़ल्ली तिकर ह़ै जींद्दा , मारी नें डूडाँ रोंणां छड्डा

अप्पु खरे ता सब खरे हैन्न, गलाणें दी ह़ी एह़ गल्ल रह़ी
मेरी इक गल्ल मन्नां अड़यो, सारेयाँ नें पल़चोणां छड्डा

मन्याँ तुह़ाड़ी नीत खरी ह़ै, दुअा़ बदनीत ता ह़ोई सकदा
जे बचणाँ गँदिया नजरी ते, बेह़ले तुसाँ मचकोंणां छड्डा

तुह़ाड़ी बड़ी चाह़ ह़ै तिस्यो,कुसीदी नी़ परवाह़ ह़ै तिस्यो
थोडा़ ह़ल्ली पर लेया जाच्ची, झट तुसाँ पत्योंणां छड्डा

खबनीं क्या रैह़ंदा लिख्दा, मुँड्डे चुक्की भ़ी नीं दिख्दा
तुह़ाड़ा ह़ी मरीद ह़ै मैह़ता, तिस पर गुस्से ह़ोणाँ छड्डा
...मनोज मैहता...

Gone so far and lost it all

रूठनें का फ़ायदा क्या? जब वो मनायेंगे नहीं
यत्न जितने चाहे करले पास अब आएँगे नहीं

मिन्नतें भी देखीं करके बड़ी जलालतें ली सह
टेके बहुत घुटनें हमनें, अब गिड़गिड़ायेंगे नहीं

सुर्ख आँखें-खुश्क चेहरा, अजब से हालात हैं
लेकिन तर्रानें विरह के , हम गुनगुनायेंगे नहीं

गूँजेंगे जब कानों में , वो कहकहे तेरे सुरमई
सुकून तो थोंड़ा आएगा पर मुस्कुरायेंगे नहीं

देखकर जिनको तुम माँगते थे दुआ प्यार की
आसमाँ में वो हसीं तारे अब टिमटिमायेंगें नहीं

मेरी आँखों से तो नींद पहले ही कोसों दूर थी
बनके लोरी जज़्वात मेरे, तुम्हें सुलायेंगे नहीं

Yeh-Na-Socha-tha Kabhi

साथ्थे छड्डी तू जे चल्ली, एह़ सोच्या मैं किह़िंयाँ जींगा?
मते पीते घ़ुट्ट सबरे दे पर जैह़र गमाँ दा किह़िंयाँ पींगा ?

तैं ता झ़ट ह़ी बोल्ली दित्ता,अपणां रस्ता ल्यैं पकड़ी मैं
सोच्या नीं पँड्ड याद्दाँ दी पर मुँड्डे चुक्की किह़िंयाँ नींगा?

काल़जे च पीड़ ह़ै मिस्णीं, लुकाणी ह़स्सी़ नें कितणीं ?
दिले दे टोटे टोटे ह़ोए, कितणां गठगा कितणां स़ींगा ?

बड़े जत्नाँ नें फूक्या मुर्दा अपणें दिले दे अरमानां दा ,
अद्ध़े ध़ामें रुकी गई मोटर, कुथु हुंण मैं पिंड्डाँ दिंग्गा ।।

-------------------------मनोज मैहता ----------------------

Dard-ey-byaan

उहिंयाँ ता मैं बड़ा उदास ह़ै पर रोंणें जो दिल नीं करदा
खुरक ह़ै प़ियो पूरे जिस्में पर न्ह़ोणें जो दिल नीं करदा

पीक पई गई मनें दे जख्में, ह़ै मुस्क रति रति ओआ दी
सबनां ग्लाया रख सफाई पर ध़ोणें जो दिल नीं करदा

इसा पीड़ा बिच किछ यादाँ हैन्न,मेरे बीत्तयो बग्ते दियाँ
तांह़ी इस जख्में ते यारो, ठीक ह़ोणें जो दिल नीं करदा

सोचदा कि दो घड़ियाँ, भ़गवानें ते लड़ी के ख़ोई ल्याँ
जाह़लु पर तू ह़ी नीं ह़ै तां ख़ोह़णें जो दिल नीं करदा

भ़तेरा सद्दया यार बेलियाँ, कुत्थकी लग्ग ह़ी बैह़णें जो
तिन्ह़ाँ पौड़ियाँ पर ह़ुण मेरा गोह़णें जो नीं दिल करदा

Marriage-in-late-thirty

मिंज्जो नें भी रखणीं यारी कनें तिसनें भी साथ निभाणां
छड्ड मोआ तू दूह़रियाँ चाल्लाँ, तैंताअपणां आप गोआणां

पै़ंतुएँ साले ब्याह़ जे ह़ोया, कितणां फिरी सैह़ फणसोया
ह़ुण भी लग ही सोई रैहंदा, होणाँ कतां ते निक्का आणां

सक्ला दिख्खी नें खुस ह़ोया, लबड़ाँ लबडाँ बड़ा चटोया
पुक्कुआँ नें नीं जमणें बच्चे, गल्ल एह़ दस्सी ग्या स्याणां

रात ह़ै अजकी बड़ी ह़ी नेह़री, कजो करा दा मिंज्जो देरी
ठिरकी ह़ाँखीं तेरिया बोल्लऩ, तैं पक्का परकाल़ा पाणां

जह़ल्याँ नें जदूँ ते लग्गी यारी , किस्मत फुट्टी तांही म्ह़ारी
ओ मैह़तया माह़णू बणीं जा, जे तैं अपणां आप बचाणाँ

day-today-life

मखौले दी गप्प थी, समझ़ी मत सच लेया
बाज्जड़ माह़नुएं नें, बेह़ली मत पच लेया

कुसकी दी रँड कनें कुसकी दी पँड यारो
बणीं खड़पँच मत, पाई खँबलखच्च देया

गौं ता उहिंयाँ मेरा भी है घ़ुल़णें जो तिसनें
बड़े ह़ी समझ़ा दे ता, मकाई पड़पंच देया

उमरा दी मार ह़ै जे, भ़ुल्लया मैं ठिच्चणां
पाई करी फिरी ग़ुत्ती, सखाई टू टच देया

अँगरेजिया च खबनी क्या ह़ै सैह़ बकया
तुसाँ भी गलाई झट, थैंक्यू वैरी मच देया

barsaat-rainy season

काल़े बद्दल़ छाये अम्बरे, गड़गड़ गड़गड़ दितियो पाई
खड्डाँ नाल़ूआँ चढ़या पाणीं, रेत ता बजरी रूड़दी आई

टटमोराँ लईया कोखी पुट्टी,  हत्थे इक भतमोरी आई
मूसणें आल़े दा ढिड फूक्या, अम्माँ घ़रयो कुढ़दी आई

मच मच्चाँ की ह़ौडाँ ह़ोड्डे, थल़्ल़िया च पाणीं गोड्डे गोड्डे
झ़ुम्ब जल़या एह़ भोक्याँ आला, पूरी ह़ी मैं चुड़दी आई

हुक्के लई बैठ्ठया जबरा, गारूए पाई नें दित्तया भ़खाई
भ्याका मँज्जे तोड़ी जादा, मैं छल्लियाँ भ़ी गुडदी आई

बरसाती दी रात एह़ नेह़री, ह़ोया दूर गड़ाका कुत्थकी
चमकी जे रती कि बिजली, निंदर सदा ह़ी उड़दी आई

लगी जे पया दुआ़ बरसाल़ा, सोह़रे नें नूँह़ खुड़दी आई
जिह़ियाँ पाणिएँ लग्गी लग्गी, कुरसे दी नीँ पुड़दी आई

ताँ तूँ ते अक्खराँ जोड़ी, लिक्खदा रेह़ा मैं तोड़ी मरोड़ी
तुसाँ जो सायद नीं गम्मीं, मेरी गज़ल ता जुड़दी आई ।।

------------------------- मनोज मैहता ----------------------

Cobras have turned poison less...

खड़पे ह़ोए दन्दाँ बाझ़ी , सँगल़ाटाँ ते बचणां पौणाँ
गीत लखोये ह़ुण बेढ़़ँगे खबराँ पर ह़ी नचणाँ पौणाँ

सैह़ जमानें ह़ोई बीते जाह़लु सब किछ था सुझ़दा
ह़ाँखीं गिंयाँ छड्डी साथे, खीसे चस्मा रखणां पौणाँ

जिद नीं करनी पुट्ठे टैमें, छड्ड मड़या तू बेह़ले बैहमे
बाँदर रैह़ सैह़रें आई, तिज्जो बणें च बसणां पौणाँ

मतियां सुणीं बैट्ठा बुड़काँ, रेड्डे नीं मैं तिस्दे फुड़काँ
काह़लु तक सुंणगा ठूसाँ, घरे जो ह़ी न्ह़सणां पौणाँ

कोई नीं तिज्जो ते डरदा, तू कजो ठँडे साह़े भरदा?
सध़रो मेया ठाणेदारा, तिज्जो रौब भी दसणाँ पौणाँ

तिज्जो ह़ै इज्जत प्यारी, मान मेरा भी रखणां पौणाँ
मैह़ते ते जे गप्प कढ़ाणीं, घुट्ट इक ता चखणां पौणाँ

life-trivia-Nagrota-Bagwan

कुत्थु ते चलयो थे ? असाँ कुत्थु पुज्जी गै ?
कईयाँ साल्लाँ बाद अज सैह़ फिरी सुझी गै

परीत ता प्यार नीं था, टिपड़ुएँ लिक्खया
ताँह़ी इसा अग्गी बिच खुर म्ह़ारे भ़ुजी गै

तरस नीं खाद्दा तिन्हाँ, बुरे दौलें फँडया
सुक्के सुक्के खाखड़ू दिक्खा क़ियाँ सुज्जी गै

सारे ह़ी ग्लाणाँ लग्गे बड़ा खरा माह़णू था
बगानयाँ मूह़ँडया जाह़लु बालुए जे पुज्जी गै

दुक्कु पँज्जु जोड़ी नें छाया जाह़लु टपरू
दुनिया ग्लाणाँ लग्गी जल़ी एह़ रफूजी गै

क्या ग्लाए 'मनोज' इन्ह़ाँ याराँ दोस्ताँ जो?
गूह़तल्याँ ह़त्थाँ तिदे सुथणुँएँ ने पूह़ँजी गै

TEST-roots-kangra-internationally-Hamriyaan-jadaan

ह़वा च लटकदियाँ लम्मियाँ एह़ बड्डयाँ बड़ाँ दियाँ
असाँ भी किछ थाह़ाँ लइए अपणियाँ जड़ाँ दिंयाँ

मनयां कि म्ह़ांजो ते लख गुणां सैह़ तेज हुँग्गा
जाच्ची नीं सकया स्पीडाँ पर म्ह़ारियाँ फड़ाँ दिंयाँ

जाह़लु दिख्खा तिन्ह़ाँ ने, पई रैंहदी बरड़ पँच्ची
कन्धाँ भ़ी ह़ुण टौंणियाँ ह़ोइयाँ ऊचयाँ घ़राँ दियाँ

लग्गा दा अज जागतें घ़रे पक्का पुज्जी पौंणा

 सस्स नूँह़ चँगेरा बिच, हैन्न रोटियाँ घ़डा दियाँ

Getting-older-jawani-hindi-gazal

ज़हन में चँद शिकायतें फिर उभरने लगीं
तेरी बातें मुझे अब सच में अखरनें लगीं

झाँक रहे हैं झरोखे से मुहल्ले के नौजवाँ
इन्हें कैसे पता कि तू फिर से सँवरने लगी

सोचता हूँ कि जोरआजमाईश मैं भी करूँ
है जवानी कम्बख्त मगर अब ढलनें लगी

आँखें और हसरतें कभी भी न वश में रहीं
वो फिसलती रहीं और वो मचलनें लगीं

तेरा यौवन, ऊपर से मौसम का मिजाज़
आग लगता है हर जगह ही लगने लगी

याद आया तेरा गदराया सँगमरमरी जिस्म
साँस मद्धम सेअब धौंकनी सी चलने लगी

TEEN-age-Romance-Kangra-conclusions drawn

कजो पाया रोल़ा अरो, कजो तँग कित्तया? 

बझ़ाई हुण ही लाटुए मैं भित्त लाई दिंत्तया ।

गौ ता उह़िंयाँ मेरा भी था दो घुट्ट लाणे जो,
तबीज गले ताम्बे दा , है चेलें पाई दित्तया ।

ठँडी ठँडी ओबरी बडी याद ओंदी तोंदिया,
टपरु सैह़ पराणां म्यो, सयालें ढाई दिंत्तया ।

कुथु पांणें लेण हुण ता कुथु पाणें मन्दलु ?
कैखी जल़्या मार्बल अंगणें बछाईं दिंत्तया । 

मत जाँदा छोरुआ, बजारे हुण किह़ला तू ,

तिसा दे भाऊंआँ तेरा, पहरा पाई दिंत्तया ।

क्या ह़ोणें जुये ह़ुण, ह़ोणियाँ क्या कौड्डियाँ 

हारीअप्पु पैसयाँ, काढ़डू जताई दित्तया |!

----------------- मनोज मैहता ----------------