life-trivia-Nagrota-Bagwan

कुत्थु ते चलयो थे ? असाँ कुत्थु पुज्जी गै ?
कईयाँ साल्लाँ बाद अज सैह़ फिरी सुझी गै

परीत ता प्यार नीं था, टिपड़ुएँ लिक्खया
ताँह़ी इसा अग्गी बिच खुर म्ह़ारे भ़ुजी गै

तरस नीं खाद्दा तिन्हाँ, बुरे दौलें फँडया
सुक्के सुक्के खाखड़ू दिक्खा क़ियाँ सुज्जी गै

सारे ह़ी ग्लाणाँ लग्गे बड़ा खरा माह़णू था
बगानयाँ मूह़ँडया जाह़लु बालुए जे पुज्जी गै

दुक्कु पँज्जु जोड़ी नें छाया जाह़लु टपरू
दुनिया ग्लाणाँ लग्गी जल़ी एह़ रफूजी गै

क्या ग्लाए 'मनोज' इन्ह़ाँ याराँ दोस्ताँ जो?
गूह़तल्याँ ह़त्थाँ तिदे सुथणुँएँ ने पूह़ँजी गै