उह़ियाँ ता मड़ा बड़ा घ़ान्दा पर साईया छड्डी कुथ्यो जाह़ँगा,
स्वासी गियो इतणीं बद्धी , पीपणिंयाँ सैह़ किह़ियाँ बजाँगा?
तिन्ह़ां दे चक्करे दा रौल़ा, चोंह़नीं पासयाँ बड़ा ह़ी पई ग्या,
उह़ियां मेरा ढिड ह़ै कच्चा, दस्सा गल्ला किंह़ियाँ पचांगा?
छन्दयाँ मिन्नताँ करी करी नें, जीआ करदा मैं मरी मरी ने ,
अन्दरें अन्दरें सोच्ची जा दा, कोह़की मिंज्जो भी पत्यांगा !
जाह़नुआँ दे गैय ह़ड्ड छलोई अपण तिन्ह़ाँ दी बस नीं ह़ोई ,
माऊ दी सगँद ख़ाद्दी मितरो, ह़टी तिसा बत्ता नी जाह़ँगा !
गप्पा नें गप्प निकल़ी जाँद्दी, फूक्की जीभ फिसल़ी जाँद्दी,
माफ करी छड्ड इब्हैं मितरा, कदी नीं ह़ुण पल़चाई पाह़ँगा !
रती कि जे टेर सैह़ लाई दिन्दा, मुँह़ें मेरे फट्ट खुड़ाई दिन्दा,
मेरे भ़ेद सैह़ जाणदा सारे, मैं तिस्दयाँ किंह़ियाँ क़ढवाँगा ?
----------------------- मनोज मैहता ---------------------
No comments:
Post a Comment