दिले दे जख्मां पर जिह़ियां ह़वा पख्खिया नें झ़ोल्ला दे , फुल्लुणुएं दे झ़ूड़यां ते तड़कें ह़ी पिद्दु पिद्दियां बोल्ला दे |
बंह़ियां बिच कोगलयां भ़ी कड़ैं कड़ैं भ़्यागा पाई दित्ती,
कुक्कड़ बचारे ठैह़रे ब्रॉइलर पोट्टेयां बिच ही बोल्ला दे |
घ़ुग्घी तोते भ़रन उडारां, घ़टारियां घ़ुम्मन अंगणां द्वाराँ ,
इन्ह़ां सबनीं दे मिठड़े बोल, सुरां मनें देयां खोल्ला दे |
प्ह़ाड़े दे पिच्छे ते सूरज, हौल़े ह़ौले लगी प्या गौंह़णां ,
किरणां दे झुंड किठ्ठे ह़ोई, भ़ौकयां सारयां खरोला दे |
नोआं नवेला निक्ल़्या ध़्याड़ा, लग्गे सारे झ़म्बां झ़ाड़ां,
म्ह़ातड़ पयी बछाणें लम्में, पराणें पोथुआं फरोला दे |
---- ---- ---- ---- ---- मनोज मैहता
No comments:
Post a Comment