ह़ौराँ दियां गप्पां क्या करिये, पह़ाड़िये भ़ी बदलोणां लग्गे,
बँदरियां-खिंद्दाँ च दड़णें वाल़े, रजाईयाँ गद्दयां टोह़णां लग्गे |
गोल़ुआं मिट्टी कुत्थु सैह़ रेह़्ई, अरो कुनीं फेरणीं ह़ुण दल़ेई ,
ढाई मुकाई करी कच्चियाँ कन्द्ध़ाँ, पक्के लैंट्टर पौंणां लग्गे |
न चुल्ह़ी ऱिईंयाँ न पचोले रैह़, न ह़ी लकड़ू रैह़ न क्योले रैह़,
स्टोपां दे बर्नल गै मुक्की, ह़ुण गैसां पर भ़त्त रन्ह़ोणां लग्गे |
बँग्ग पराँदू रिबन्नां भ़ुल्लियां, जीनं फसाई बड़ियां फुल्लियां,
बिट्टियाँ छोह़रू बणीं के ह़ंड्डन, जागत कनें चतरोंणां लग्गे |
ह़ोआ दे झ़ौक्के ऐसे झुल्ले, सांद्दीं, समू़त ता मैन्नेंयां भुल्ले ,
कुनीं पिटणिंयां एह़ चौध़राँ, पैलसां बिच ब्याह़ ह़ोणां लग्गे |
नोंआं जुग ह़ै नोंईयां गल्लां, कुत्थु तोप्पादा पारुआं डल्लाँ,
मैह़तया तू मोआ जबरा ह़ोया , जवान न्याणे ह़ोणां लग्गे ||
--- ---- --- --- --- --- मनोज मैहता ---
No comments:
Post a Comment