ह़िमाचले देयो नौजवानों कुस बख्खे तुसाँ खिट लगाईयो
दारुआ दियाँ तां गप्पाँ ह़ी छड्डा चप्पें चप्पें भँग्ग पुजाईयो
पूल कनें स्नूकर बस बह़ानें, चुणी लेयो मेयो नोयें ठकाणें
सारा ह़ाल ध़ुँएं ने भ़रोया समैका दी जिंह़ियां ध़ूणीं पाईयो
बेसबॉला दे बैटाँ फसाई सौए दिया स्पीडा बाईकाँ दौड़ाई
सौ ग्राम मास नीं चुतड़ाँ च, बेह़ली कजो बदमासी पाईयो
ह़ाँखीं दे तां कलोडु चढ़यो खाड्डु चमड़िया अँदर बड़यो
ह़ैगरे लगदी कमीज टंगोईयो जल़ी जीन ए़ कुथु फसाईयो
माऊँ बब्बाँ पासे तां दिख्खा कजो बणा दे खोटा सिक्का
खून परसीने दी गाढ़ी कमाई, कजो नशयाँ बिच उड़ाईयो
पागलाँ जो जेह़ड़ी दवाई लाँदे, तिन्हाँ कैप्सूलाँ तुसाँ खाँदे
तुह़ाड़ेयाँ पुठ्ठे कम्माँ जो दिख्खी, देवभ़ूमि बड़ी शरमाईयो
मोटरसैक्लाँ लोआह़ी दै दे या फँदयाँ गल़ेयाँ च लाई लै दे
जींदे जी असाँ मरी चल्ले ऐसी कजो तुसाँ अग्ग लगाईयो
..मनोज मैहता
No comments:
Post a Comment