छल्लियाँ दे ता रही गै गुल्लु पर ध़ान ह़ुण पकणां लग्गे
श्राद्धाँ ते मसे जे गै छुड़की नवरातरे मुँड्डे कढणां लग्गे
मौसम भी बदलोंदा आया, रती रती ठंड लगी बझ़ोणां
रात्तीं किछ लम्मियाँ ह़ोईयाँ ध़्याड़े दिख्खा घटणां लग्गे
गाँधी जयँती मसें म्या बीती ठेकेदारें दारू मँह़गी दित्ती
माईके दी वाज सुणींने सब रामलीला जो ऩठणां लग्गे
नारद मोह़ ते पृथ्वी पुकार खब नीं कैस गलाँदे बो यार
स्टेज सैक्ट्री माईके फकड़ी जोरें नें किच्छ पढ़ना लग्गे
ध़ान्नां दी जाह़लु चली कटाई, जणासाँ मर्दाँ गई थकाई
खाली बैठ्ठयों मीटे वाल़े, भ़ार कुक्कड़ाँ दे बध़णां लग्गे
गाह़्ंणी दा कम्म जे पोणां, बजार फिरी ते मँदा ह़ोणा
फिलह़ाल तां फैणियां अाले़ आट्टा पैरां ने मथणा लग्गे
बंग्गाँ, पराँदू, छक्कु सीसे खाली ह़ोणें सबनीं दे खीस्से
करवाचौथ जे आया नेड़े जणासां दे भ़ाअ बध़णा लग्गे
अपण ह़ल्ली रती कि ठह़रा, पह़लैं ओणां मेयो दसह़रा
अक्तूबर मह़ीना उंह़िंयाँ ठँडा, मुँह़ मर्दां दे भ़खणा लग्गे
तीह़ां तरीकाँ आई दयाल़ी, जेबाँ उध़डियाँ ह़ोयो खाली
ड्राई- फ्रूट कनें मठयाईयाँ, बुरे ह़ाखीँ मेयो लगणा लग्गे
.. मनोज मैहता
No comments:
Post a Comment