काँगड़े पईयो गर्मी, मकलोड़गँज बरखा पोआ दी
औथु छुटन पसीनें मितरो कनें इथु ठँड बझ़ोआ दी
नगरोटा प्या उबल़ी उबल़ी, पालमपुर ह़ै ठँडा ठार ,
उतराल़े दी मस्त ह़ोआ चोबीनाँ पुज्जी गरमोआ दी ।
कोसरी ता लम्मे ग्राँएँ तौंदिया माह़णूँ किंह़ियाँ जाएँ ,
कनें चँदपुर जाई नें दिख्खा, कोटी लाणाँ पोआ दी ।
भँगाल़ बड्डा-छोट्टा , बिलिंग, मुलथान ता लुहारड़ी ,
मिट्ठी-मिट्ठी ठँड्डी ठार ह़ोवा पूरे पिन्ड्डे च भ़रोआ दी।
मन्याँ कि शाह़पुर गरम ह़ै जा भ़ला बोह़ दरीणियाँ ,
गाय़ी दी सौह़ रूह़ खुसिया ने नच्ची नच्ची पोआ दी ।
डमटाल़, नूरपुर, जसूर, जवाल़ी धमेटा या फतेह़पुर,
साह़की तुह़ाकी मैंनु तैनुँ , बोल्ली भ़ी बदलोआ दी ।
देहरा, गरली परागपुर ज्वालामुखी मझींण जसवाँ ,
सारे लाके लेयाँ हँड्डी, अपणीं ही जिमीं बझ़ोआ दी।
म्ह़ारी ताकत खुब्बदी बड़ी ताँह़ी स्कीमां घ़डी घ़डी,
काँगड़े जो तोड़ने दी बड़ी साजश गह़री ह़ोआ दी !!
----------------------मनोज मैहता ---------------------
No comments:
Post a Comment