गल्ल पराणी ठीक ह़ै कि काणीं बँड बुरी,
अपण इबकी एह़ मितरो खुश्क ठंड बुरी
समझ़ाणें दी गप्प, फूकी कजो लगाई बो,
तिन्नी भ़रोयो बजारे च करी त्ती झ़ंड बुरी
मिरक मारना बड़ा मयो मंह़गा पेयी गया,
तिसा दे भाऊआँ ते बज्जी ह़ाय फँड बुरी
डाक्टरें जाह़लु ते दसया शुगरा दा खतरा,
तदुँ दी ह़ी बझ़ौदी खसमाखाणी खंड बुरी
मत्थयाँ टेक्का भ़ौंयें चामुण्डा या भ़ौअणें
ढोणा ह़ी पौणीं अपण करमा दी पँड बुरी
पह़लें सारा ध़्याड़ा गीत तिसा दे गांदा था,
जुत्त- पल़ै ह़ोई ताँ बोलादा सैह़ ह़ै रँड बुरी|
मुर्देयाँ उपर नी खिल्लाँ-भ़ान्नाँ दी छँड बुरी,
अपर गुल्ली-डँडे दी भ़ुत्थी कनें भ़टँड बुरी
खाखी पर ह़ै उपड़ेया ऐ़ कोई डिजाईन नी,
खरा घ़सुन्न जवानें दा पर बुड्ढे दी चँड बुरी
.. मनोज मैहता
No comments:
Post a Comment