उह़िंयाँ तां बड़ा मितर बणदा, यारी अपण नभ़ाई नीं
तेरी भ़ूरी म़ैह़ सूई जाह़लु बोह़ल़ी तैं मेयां खोआई नीं
सौ बारी मिन्नतीं कित्तियाँ, अपणियां सगँदीं दित्तियाँ
तिसादे मुँड्डे जूँ नीं रेंगी, मदरोट सैह़ मिलणां आई नीं
बड़ेयाँ साल्लां बाद जे मिल्ले तार दिले दे ह़ोये ढिल्ले
ह़ाखीं ने तां मिल्लिया हाखीं, मैरह़मी तिन्नें कढाई नी
उँघ़ें नें उह़िंयाँ रेड्डे गया मैं मुन्नुएँ दा भ़ी पुक्कु लेया मैं
अपणं तिन्नें नदिख्खा कित्ता रती भ़ी मेयो कल़ाई नीं
बीड़िया पर बीड़ी लाँद्दा, डाठ्ठीं लग्गया दिख कल़ाँद्दा
दूँ ह़ीं कदमा साह़ फुल्ली चलदा, ह़ुँदी चढ़ी चढ़ाई नीं
ह़ुण पिंड्डा ढल़ना लग्गया, कजो जोरे दसणां लग्गया
गप्प एह़ मेया गठ्ठी लैह़ बह़न्नी, ह़टी जवानी आई नीं
.. मनोज मैहता
No comments:
Post a Comment