चिट्टे कपडेयां लाई घ़ुम्मदा रैह़ंदा, सैह़ बत्ता साह़ड़िया ,
तरकाल़ां तौल़े मणसोआ करा, खाई जांह़ंगा प्ह़ाड़िया |
गप्प मेरी सच्च तुसाँ मनदे कैंह़नी, बो बेकूफ छोरूओ ,
डैण म्यो बोंकरिया पर बह़ई नैं, उड्डा दी थी लाह़ड़िया |
चार छौरू ह़ल्ली परसूं ह़ी, अंबे ह़ेठ खाई लेयो घ़ोगड़ें ,
चड़ेल जब्बरिया दिया चौथ, मरोड़ी गिय्यो कयाड़िया |
बाझ़ी मुँड्डे आल़ा कोखी मिल्लादा, इक्कुए दे मोड़े पर ,
कोह़की बोल्लें छह़्लेड्डा ह़ै ता कोह़की अद्धमसाणियां |
बनाह़ं बड़ा भारी रौल़ा पया, म्यो तिस जल़े माखुये दा ,
घु़ल़ी पोआ दा जणासां- बिट्टियां नें, दिनें ता दिहाड़िया |
म्ह़ारियां माऊँ म्ह़ाजो इन्नीं दायें, गप्पां सुणाई- डराई नें ,
सोआंदिंयां थिंय्यां बड़ोह, धलूँ , नगरोटे कनें चाह़डिया |
ह़ुण सारे टैम्में नें घरे झट बस, इसह़ी डरे पुजी पोआ दे ,
चड़ेल बचारी ता भौंएं बख्सी दिंग्गी, मेकी देणें लाड़िया |
--------------------------- मनोज मैहता ----------------------
No comments:
Post a Comment