जल़ी एह़ तौंदी..!!

खड़े कुआल़ां चढ़दी आई, रिढ़ियां ध़ारां गौह़ंदी आई ,
खड्डां- नाल़ुआं पत्थर तप्पे, बड़ी बुरी एह़ तौंदी आई |

पर्सीनें ने पिंडा तलमल, सड़काँ बिच रुक्की हलचल ,
पख्याँ ते भ़ी लू ह़ी चल्ले, बोड़ियाँ नड्डां सकौंदी आई |

ब़ल्लड़ु सुक्का,खल्ह़ड़ु सुक्का ऐसा गंदा ह़ै एह़ ध़ुप्पा,
धूड़ी भकोईयो फरड़ी कुत्ती, लग्गे म्यो हल़्कोंदी आई !

उआने बरैंडे बिच माक्खियाँ, भ़त्ते पर कढन झाँकिंयां,
मच्छरां दी इक पूरी पल़्टण, बुरे दौल्लें भण़कोंदी आई |

पिठ्ठी बिच निकल़ी पित्ती, नाखनाँ सारी छिल्ली दित्ती ,
रसोईया ते भाबो भी, दिख्खा किंह़िंयां खरकोंदी आई |

घ़ड़ोलुए दा ठंडा पाणी, कुथु मिलनां बो मेरिये जान्नीं,
फिल्टरां फ्रिज्जां दी ठरक म्यो ह़ुण तां पूरी होंदी आई |
---------------------------------------------- - मनोज मैहता