Let's measure the depth of our roots

ह़वा च लटक्कदियाँ लम्मियां एह़ बड्डयां बड़ाँ दियां ,
असां भी नापणिंयां गह़राईयाँ अपणिंयां जड़ाँ दियां |

मन्नयां अरो कि मांह़्जो ते चैंट्ट हुँग्गा सैह़ लख गुणां ,
जाची रती नी सक्या स्पीडां पर म्हारियां फड़ाँ दियां |

जाह़लु दिख्खा तिन्ह़ां नें, पेई बस रैह़ंदी बरड़ पँच्ची ,
कंद्ध़ां भी मोइयां टौणिंयाँ ह़ोईयां ऊचयां घराँ दियां |

शैम्पुआं-क्रीमां लाई लाई जीह़ँडा तिन्नी छड्डया पुट्टी ,
मुँड ता टटरी ह़ोया ह़ी था, ह़ुण मुछाँ भी झड़ा दियां |

लग्गा दा अज फौजिएं, छुट्टिया घ़रे आई पुजणां है ,
  सस्स कनें नूह़ं चंगेरा बिच,  ह़ैन्न रोटियां घ़ड़ा दियां |

कवि कनें नेते करदे रैह़ंदे, घरां च बेह़ी करी देशप्रेम
तिन्हां दे बुह़्ड़े दा क्या जाँदा, ह़ैन्न फौजाँ लड़ा दियाँ ||
---------------------------------------------- मनोज मैहता